Essay on 'Sohbat-e-Sadiqeen' - Az - Nizam Mehdi

Farman-e-Khudawandi Hai, “Aye Imaan Walon Allah Tala Se Daro Aur Sadiqien Ke Saath Hojao”, Aur Sadiqien Wahi Log Hain Jin Ke Mutaaliq Allah Tala Ne Irshad Farmaya Ke Wo Muhajirin Fuqra Ke Liye Jo Nikale Gaye Apne Gharo Se Aur Chin Liye Un Ke Maal, Wo Log Allah Taala Aur Us Ke Rasool S.A.W.S Ki Madad Karte Hain. Yahi Wo Log Hain Jo Sadiqien Hain. Sadiqon Ki Sohbat Ke Bagair Haq Taala Ke Deen Ki Maarifat Aur Isteadad Paida Nahi Hoti Aur Haq Taala Ki Sifaat Aur Zaat Ka Deedar Hasil Nahi Hota.

Ek Roz Bandagi Miyan Syed Khundmir Rz Ke Ghulam Zerak Rz Ne Hazrat Se Arz Kiya Agar Aap Mujhe Aazaad Karde Toh Main Khuda Ki Bahot Ibadat Karunga Hazrat Ne Usko Aazad Kardiya Lekin Ye Farmaya Ke Bahot Ibadat Karne Se Zerak Ko Jannat Mil Jayegi Deedar Naseeb Nahi Hoga, Ye Toh Murshid Ki Sohbat Aur Zikrullah Se Hasil Hota Hai.

Taleem Ke Liye Zuban Ka Masla Paida Ho Sakta Hai Lekin Sohbat Apna Khamosh Asar Dikhati Hai. Sohbat Zuban Se Beniyaz Hai Jis Ki Sohbat Mein Rehte Hain Uski Guftar, Uska Kirdar, Dusron Ko Zarur Mutasir Karta Hai. Rasool S.A.W.S Ne Toh Ek Behtrin Misaal Sohbat Ki Di Hai, Aap Ne Farmaya Attar Ki Dukan Par Jaao Toh Baujud Iske Ke Tum Ne Kuch Bhi Attar Nahi Kharida Magar Jabtak Tum Wahan Baithe Rahoge Atar Ki Khusbu Toh Barabar Aati Rahegi. Isi Tarah Koyle Ki Dukan Par Jaaoge Toh Kam Az Kam Kapdo Par Kuch Na Kuch Kaalik Lag Jayegi.

Isi Tarha Hamein Pata Chalta Hai Ashabe Kahaf Ke Saath Rehne Wala Ek Kutta Jab Nek Logo Ke Sohbat Mein Raha Toh Uska Shumar Bhi Nek Logo Mein Hogaya Aur Aanhazrat S.A.W.S Ke Farman Ke Mutaabiq Wo Kutta Jannat Mein Jayega. (Subhanallah)

Uske Barkhilaf Nooh A.S Ka Beta Bure Logo Ke Saath Uthne Baithne Laga Toh Wo Nabuwat Ke Khandaan Se Be Behra Hogaya Aur Kaafiron Ke Saath Tufan Mein Dub Gaya. Chunanche Sohabate-e- Sadiqien Ke Baab Mein Hazrat Meeran Syed Mehdi Maud A.S Se Naqal Hai, Sohdbat-e- Sadiqien Farz Aein Hai. Lihaza Farman-e-Mehdi A.S Ke Mutaabiq Hum Mehdavi Bhaiyon Ko Sohabat-e- Sadiqien Par Amal Karna Zaruri Hai Agar Hamara Maqsad Khuda Ka Deedar Hai.

Har Ek Shaks Par Ye Farz Hai Ke Wo Sohabat-e- Sadiqien Ikhtiyar Karke Apne Dakhili Wa Khaarji Ahwaal Ki Islah Kare Aur Sadiqien Ki Sohbat Mein Rehkar Ek Sachcha Momin Banne Ki Koshish Kare Warna Jo Shaks Sohbate Sadiqien Se Dur Rehekar Ye Daawa Karta Hai Ke Wo Momin Hai Toh Aisa Shaks Apne Daawe Mein Jhoota Hai. Agar Aaj Hum Moujuda Mahol Aur Insaniyat Ke Taqazon Par Ghaur Karen Toh Hum Ko Insaani Zindagi Alag Rahon Mein Bati Hui Milegi. Aaj Ka Bigda Hua Maahol Jis Tarah Insaaniyat Ka Mazaaq Uda Raha Hai Wo Ek Sanjeeda, Samajhdar Aur Saleh Dil-o-Dimag Rakhne Wale Shaks Par Makhfi Nahi Hai.

Allah Tabarak Wa Taala Ne Apne Kalaam Quraan-e-Hakim Mein Kai Martaba Sohbat-e- Sadiqien Ke Taaluq Se Irshaad Farma Raha Hai. Surah Al-Imran Mein Irshad Farmata Hai,  “Aur Tum Mein Se Ek Jamaat Aisi Hona Zaruri Hai Jo Logo Ko Khair Ki Taraf Bulaye Aur Nek Kaamon Ka Hukm Kare Aur Bure Kaamo Se Roka Kare Aur Aisa Karne Wale Log Pure Kaamiyab Honge.” Ambiyaein Ikraam Mein Hazrat Musaa Kalimullah Ka Jo Martaba Hai Wo Quraan Mein Chupa Nahi Hai Lekin Aise Jalilul Qadr Paighambr Ko Bhi Allah Ne Khizar A.S Jaise Saadiq Ki Sohbat Mein Rehne Ka Hukm Diya Tha. Aur Ek Jagah Allah Taala Farmata Hai, “Aye Imaan Walon Allah Taala Se Taqwa Karo Aur Saadiqien Ki Sohbat Ikhtiyar Karo.”

Ye Farmane Ilahi Us Amar Par Dalalat Karta Hai Ke Tamam Musalman Saadiqien Ki Sohbat Mein Rehkar Apne Akhalaq Aadaadt Aur Kirdar Ko Saware Aur Amar-e-Ilahil Par Khud Karband Ho Kar Dusron Ko Allah Taala Ki Itaat Aur Uski Khushnodi Ki Taraf Daawat Dein. Saleh Muashra Usi Waqt Tashkil Pa Sakta Hai Jab Tamaam Log Saadiqien Ki Ijma Par Yaani In Ke Faislo Par Karband Ho Jaaye. Jo Tabqa Saadiqien Ke Faiz-e-Sohbat Se Apne Aap Ko Mustaid Kar Sakta Hai Aur Yahi Tabqa Sahi Khidmat Bhi Kar Sakta Hai Aur Khuda Wala Tabqa Kehlaya Ja Sakta Hai.

Isliye Ke Allah Tabarak Wa Taala Ne Khud Saadiqien Ki Sohbat Mein Rehne Ki Har Ek Shaks Ko Taakid Ki Hai. Aaj Ki Is Bigde Huye Insaani Maahol Ko Saadiqien Hi Insaaniyat Se Roshnaas Kara Sakti Hai Aaj Ka Moujuda Maahol Insaaniyat Soz Hai,  Aur Uska Taqaza Ye Hai Ke Wo Deen Fitrat Yaani Mazhab Islam Ke Usulon Ko Apnaye Aur Insaaniyat Ki Meraj Ke Hasul Ko Apna Maqsad-e-Hayat Banaye. Magar Insaaniyat Usi Waqt Meraj Kamal Ko Pahonch Sakti Hai Jab Ke Wo Hazrat Mehdi A.S Khalifatullah Ke Faramin Mein Par Ghaur Wa Fikar Kare Aur Us Rah Ko Apnaye Jiski Daawat Hazrat Mehdi A.S Ne Quraan-e-Hakim Ki Roshni Mein Aalame Insaaniyat Ko Di Hai. Salah Ho Ke Islah Usi Waqt Kargar Ho Sakti Hai Jab Ke Akhlaqi Qadron Ko Pehchan Kar Dusron Tak Pohchane Wale Qaumo Mein Paida Ho. Hazrat Mehdi A.S Ke Is Farman “Sohbat-e- Saadiqien Farz”  Mein Bhi Qaumo Ki Salah Wo Islah Ka Dars Poshida Hai.

Aakhir Mein Dua Hai Ke Allah Taala Hamein Sahi Maano Mein Saadiqon Ki Sohbat Mein Rehne Ki Taoufiq Ata Farma Aur Apne Khaas Fazal Se Apna Khaas Deedar Ata Farma. (Aameen).

Reference: 

• Sohbate Sadiqeen Ki Farziyat Ka Asbaat Farameen Hazrat Syed Mehdi Maoud Khalifatullah A.S. By (Hazrat Moulana Abul Hadi Syed Mahemood Sahab Akelvi^rh).
• Mojamuddin By (Hazrat Moulana Syed Meeranji Abid Khundmeeri Sahab Qibla).
• Tasdeeq Wa Amal By (Hazrat Moulvi Muhammad Nooruddin Arbi^rh.

AAbout the writer and write-up/Essay:

Janab Nizam Mehdi s/o Janab Abdul Mannan Mungle Saheb is a resident of Ausa, Latur District, Maharashtra. He has completed his  BE in Mechanical Engineering and currently preparing for competitive examinations. This Essay is a part of the International Essay Writing Competition conducted by Mehdavia Times Welfare Trust & IGM during the last year Ramazan i.e; Ramazan of 1441 hijri / 2020 taking the opportunity of the Pandemic Lock-down. Mr. Nizam Mehdi had secured the First Price in this Competition in the in Senior Urdu Category, the same essay is transcribed by himself in Roman Urdu as we do not have the facility to type it in urdu. We Wish him all the Best for her future endeavors, May Allah Bless him with success in both the worlds. And Specially pray for his success in his competitive examinations. Aameen.

The results of the competition can be seen here; https://mehdaviatimes.blogspot.com/2020/05/announcement-of-results-of.html

Note: We will be publishing daily one selected essay in this Ramazan for you to read. We take this opportunity to thank and congratulate all the participants, winners and evaluators and those who were directly or indirectly involved to make this initiative a grand success. Fresh Write-ups/Articles/Essays are always solicited you may send them to MehdaviaTimes@gmail.com . 

Disclaimer: The opinions expressed in this publication are those of the authors. They do not purport to reflect the opinions or views of the Mehdavia Times Welfare Trust or its members. Reproduction of the material contained in this publication may be made only with the written permission of Mehdavia Times Welfare Trust. To Err is Human, Please ignore any typos or concepts which you may find in his / her write-up. If you come across, any major typos kindly write to us on mehdaviatimes@gmail.com