Tasdeeq-e-Banda A'mal Ast - Az - Tamakuwala Marufa Abdulhamid

Assalamu Alaikum Wa Rahmatullahi Wa Barkatuh

Bandi Shukr Guzar Hai Us Paak Parwardigar Ki Jisne Ye Dusra Mouqa Inayat Kiya Is Essay Competition Me Participation Karneka. Aur Shukr Guzar Hu Team Mehdavia Times Ki Jo Mujh Jaise Kayin Mehdavi Students Ki Housla Afzayi Karte Hai, Allah Paak Aap Ku Jazaa-e-Khair A'ta Kare. Isbaar Bandi Aap Ke Samne Wo Essay Le Kar Moujood Hai Jiska Unwan Hamare Liye Paththar Ki Lakir Hai Aur Usko Hamari Zindagani Se Jodna Hamari Rasayi Khuda Tak Karwa Sakta Hai.

Unwan ka Maqsad:- Maqsad Ye Hai Ki Ham Sab Zahiri Umoor Par Hi Nahi Balke Har Aitebaar Se Sachche Pakke Mahedvi Bane, Aur Bandi Ka Ye Essay Mere Saath Saath Aap Sab Readers Ke Liye Bhi Kabil-e-Ghaur-o-Fikr Bane.

Amma Baad, Irshaad-e-Baari Ta'aala,

اِنَّ اللّٰہَ  یُحِبُّ  الۡمُتَّقِیۡنَ

وَ اعۡلَمُوۡۤا اَنَّ  اللّٰہَ  مَعَ الۡمُتَّقِیۡنَ.

…..(1)

Is Tarah Digar Maqamat Par Allah ^Swt Ne Quran Kareem Me Saaf Keh Diya Hai Ki "Allah Muttaqiyon Se Mohabbat Karta Hai."

Ab Bandi Ka In Aayaaton Ko Yahan Pesh Karne Ka Maqsad Samajhte Hai. Muttaqi Ke Ma'ane Hota Hai Taqwa Shiyar, Parhezgaar, Ba-A'mal, Khuda Ka Khouf Khane Wale Bande.  Ab Parhezgaari Kya Hoti Hai? Jawab Ye Rakhti Hu Ki Wo Har A'mal Jisse Khuda Naraz Ho Us Se Door Rehna, Khilaaf-e-Nafs A'mal Karna, Dusro Se Ziyada Khud Pe Nazar Karna, Riyakari Se Bachna. For Example; Ramzan Ke Roze Hame Taqwa Sikhate Hai, Khuda Ki Raah Me Zakaat Dena Ye Bhi Ek Parhezgaari Wala A'mal Hai, Isko Mamooli A'mal Na Samjhiyega, Iske Bayis To Ishq-e-Khuda Jo Hamre Qalb Me Hai Usme Izaafa Hota Hai, Aise Har Neik A'mal Bando Se Lekar Allah Apni Mohabbat Se Hamare Qalb Ko Munawwar Karte Rehte Hai.

Maloom Ye Hota Hai Ki Jo Huqm-e-Khudawandi Aur Sunnat-e-Rasoolullah ^Saw. Par A'mal Paira Hai Wo Muttaqi Hai. Aur Muttaqi Apne Har Taqwiyat Wale A'mal Se Khuda Ki Mohabbat Ka Mustahiq Banta Hai. Alhamdu Lillahil A’zeem.

Ab Ham Taalimaat-e-Khalifatullah Mahedi Muradullah ^AS. Par Ghor Karte Hai. Jo Khuda Se Milane Wali Taalimaat Hai, (Zahoor-e-Mahdi ^AS. Ka Maqsad Hi Ummat-e-Mohammad ^SAW Ko Halaqat Se Bachana Aur Deedar-e-Khuda Ko Aam Karna Hai)

Sab Se Pehle Jante Hai 'What's The Meaning of Khalifatullah?’

"Khalifatullah Wo Hota Hai Jisse Khuda Khud Mukhatib Hota Hai, Unpar Farishto Ke Zariye Nahi Balke Bilawasta Khuda Unse Kalaam Farmata Hai" (2)

Subhan Allah!

Hamare Aaqa Meeran Sayyad Mohammad Mahedi ^AS. Farmate Hai, "Ullimtu Minallahi Bila Wastatin Jadidul Youm" (3) [Bande Ko Roz Bila Wasta (Bagair Koi Jariye Ke) Allah ^SWT Se Taaza Taalim Haasil Hoti Hai] Alhamdu Lillah!

Ye Hota Hai Khalifatullah Ka Maqaam! Zahir Hai Jo Khalifatullah Ka Farman Hai Wo Allah ^SWT Ka Hi Farman Hai.

Ab Dekhte Hai Allah Ke Kya Farman Hai Jo Ham Tak Khalifatullah Ke Jariye Aaye Hain. Briefly Yahan Par Rakhna Chahungi;

Seerat-e-Khalifatullah Mahedi Muradullah ^AS Me Padha Hai; Jab Hazrat Khizar ^AS. Wo Amaanat Jo Unhe Khatim-e-Nabuwwat Sarwar-e-Doaalam Mohammad Mustafa ^SAW Se Mili Thi Use Mahedi ^AS Ke Hawale Karte Hai, Jo Ke,

First Ek Taala Laga Hua Sandooq Jisme Ehkaam-e-Vilayat The.
Second Paskhurda-e-Khazoor (Dates) Tha.

Sandooq Me Zikre Khafi Ki Taalim Aur Ye Ehkaam-e-Vilayat Moujood The:-

1. Tasdeeq-e-Mahedi ^AS Farz Ast
2. Tark-e-Duniya
3. Talab-e-Deedar-e-Khuda
4. Uzlat-e-Az-Khalq
5.  Hama Waqt Zikr-e-Khuda Karna
6. Tawakkul Tamaam Bar Zaat-e-Khuda
7. Sohbat-e-Sadiqeen
8. Inkaar-e-Mahedi ^AS Ko Kufr Janna
9. Hijrat-e-Azwatan
10. Ushur
11. Noubat Jagna
12. Saviyat (Allah Diya Jo Haasil Ho Use Sab Me Equal Hisse Me Taqseem Karna) ....... (4)

Ye Ehkamat Jinhen Farayiz-e-Vilayat Ke Naam Se Bhi Yard Kiya Jaata Hai, Jo Dar Haqeeqat Khuda Ke Deedar Ke Khazano Ki Chabiya (Keys) Hai,

Unwan Ke Talluq Se Mahedi ^AS. Ke Kuch Farameen Pesh Karna Chahungi;

1. Bande Ko Qubool Karna A'mal Saleh Karna Hai Wagarna Be A'mal Qubooliyat Mardood Hai. (A) (Ba A'mal Maqbool, Be A'mal Mardood)
2. Mahedi ^AS. Ki Tasdeeq A'mal Se Hai, Na Ke Sirf Iqraar-o-Aiteqaad (Admit). (B)
3. A'mal Karo, Be A'mal Agar Bande Ki Posst (Skin) Bhi Pahen Len To Hargiz Najaat Na Paayega Jab Tak Ki Bande Ki Taalimaat Par A'mal Na Ho. (C) …. (5)

In Farameen Ka Nichod Hai Ye Ek Farman, TASDEEQ-e-BANDA A'MAL AST [Bande Ki Tasdeeq (Karna) A'mal (Karna) Hai.]

Wajeh Hua Ki Aaqa ^AS. Ki Taalimaat Jo Ham Ehkaam-e-Vilayat Me Dekhe Hai Us Par Sakhtayi Se Ba Khushu-o-Khuzu A'mal Karna Hi Ek Sachche Mahedavi Musaddiq / Musaddiqa Hona Hai.

Aaqa ^AS. Ne Jo A’mal Ast Kaha Usse Sirf Ahekam-e-Vilayat Hi Nahi Balke Kitabullah Aur Itteba-e-Rasoolullah ^SAW Bhi Muraad Hai. Kya Ham Is Par Waqeyi Me A'mal Paira Hai? Chaliye Aaj Khud Se Sawal Karte Hai. Kya Ham Sahih Amount Me Ushar Nikalte Hai? Kya Do Waqt Ka Zikr Karte Hai? Tarq-e-Duniya Sahih Umar (Age) Me Hosh-o-Hawaas Ke Saath Karne Ka Irada Kiya Hai? Kya Hijrat Ke Jariye Tabligh-e-Mahedviat Ko Aam Karne Ka Irada Kiya Hai? Allah Hu Akbar. Hamare Buzurgane Deen Ne Apni Zindagiya Qurbaan Kar Di, Tosha-e-Vilayat Ki Hifazat Ke Waste Apno Se Kinara Kash Ho Gaye, Allah Ko Paane Ki Talab Ne Unhein Deewana Kar Diya, Unke A'maal Ne Unko Urooz Par Pahocha Diya. Ye Baatein Sirf Sun Ne Tak Mehdood Nahi Rehni Chahiye Balke Hamein To Buzurgon Ko Ideal Maan Kar Chalna Chahiye Aur Ravish-e-Mahedi ^AS Ko Zinda Rakhne Ko Hamara Maqsad Banana Chahiye.

Lekin !!! Bandi Ko Ye Kehte Hue Bahot Afsos Ho Raha Hai Ki Aaj Ke Dour Me Aisa Nahi Raha, Walidain Ko Bachcho Ke Future Ki Fikr Duniya Ke Aitebar Se Hoti Hai Na Ke Unke Imaan-o-Aquide Ki Hifazat Ke Aitebar Se. Allah Hu Akbar! Mahdi ^AS Ne Kya Farmaya Aap Sab Bhi Jante Hai Ki Jo Hamare Hai Wo Khuda Ko Dekhte Dikhate Marenge To Kya Ye Silsila Khatam Ho Chuka Hai?? Astagfirullah. Agar Aisa Hai To Fir Hamne To Goya Aankho Pe Patti Bandh Ke Haq Ko Na Dekhne Ki Thaan Rakhi Hai.

Kya Ham Hazrat Imamuna Mahedi ^AS. Ki Jo Aakhri Waqt Me Batayi Baat Ko Bhul Gaye? Chaliye Aaj Fir Se Yaad Karte Hai Kyuki Wo Isi Unwan Se Judi Hui Hai. Mukhtasar Andaz Me Pesh Karti Hu Ki Jab Miyan Shah Naimat Farooq-e-Vilayat ^RZ Ke Rone Ki Awaz Ko Imamuna As Ne Suna To Farmaya :- “Miyan Naimat Abhi Waqt Rone Ka Nahi Hai, Abhi To Banda Tumme Moujood Hai, Jab Tak Bande Ki Rawish Par Chaloge Muddua-o-Maqsad Ko Pesh-e-Nazar Rakhte Hue Bande Ke Sunaaye Ahekamat-e-Ilahi Par A'mal Karoge To Samjho Ke Banda Tum Me Hai, Aur Rone Ka Waqt To Wo Hoga Jab Banda Tumme Nahi Hoga (Yaani Jab A’mal Chut Jaega)” Allaah Allaah!!.

Ek Baat Yaad Aa Rahi Hai Ki Hazrat Khwaja Hasan Basri ^RH Ko Kisi Ne Pucha Ki Kya Aap Ne Yaaran-e-Mustafa ^SAW (Sahaba-e-Rasoolullah ^SAW) Dekha Hai? To Farmaya. ‘Haa’ Logo Ne Kaha Ki Yaaro Ka Haal Kaisa Tha? Jawab Diya Ki “Agar Tum Ko Yaran-e-Mustafa ^SAW Dekhe To Tumko Kaafir Kahe Aur Tum Yaran-E-Mustafa Saw Ko Dekho To Tum Unko Deewana Kaho”..(6)  To Is Dour Me Hamein Yaaran-e-Mahedi ^AS. Dekhe To Kya Kahenge? Isbaat Par Lamha Ghor-o-Fikr Kijiyega.

So Change Is Required, Fine! phir Aaj Wada Karte Hai Apne Aap Se Ki Deedar Khuda Ki Talab Aur Ba-A’mal Hone Ko Ham Apna Odhna Bichona Bana Lenge. (Allah Hame Kamiyabi De.)

Ab Ham Ek Step Aage Badhte Hai, Jaise Tasdeeq-e-Mahedi ^AS Ke Liye Jaise A'mal Saleh Zaroori Hai Waise A'mal Bhi Tab Qabil-e-Qubool Hota Hai Jab Niyyat Saaf Ho.

Sahih Bukhari Sharif Ki Pehli Hi Hadees Hai Ki,

Rasoolullah ^SAW ne Farmaya:- "A'mal Ka Dar-o-Madar Niyyat Par Hai."  ..(7)

Bandi Ne Ek Ek Baat Kuch Na Kuch Maqsad Ke Saath Pesh Ki Hai. Chaliye Is Hadees Ka Yahan Hone Ka Maqsad Samjhte Hai. Tasdeeq Tab Sahih Hogi Jab A'mal Hoga, Aur A'mal Tab Sahih Hoga Jab Niyyat Paak Hogi. Yahan Niyyat Me Khot Se Muraad Riyakaari Hai. (Riyakaari-Dikhawa, Show Off). Riyakaari Wo Gunaah Hai Jiska Root Shirk Kehlaata Hai. Kyuki Insan Dusre Insan Ko Dikhane (Gairullah Ke Liye) A'mal Karta Hai To Kya Youm-e-Hashr Insan Insan Ko A'mal Ka Sawab Dega ? Ya Allah ^SWT Denge? Nauzubillah. Khud Pe Kitna Bada Zulm Hai Riyakaari. Aaj To Ye Fitna Itna Aam Ho Chuka Hai Social Sites Ke Zariye Logo Ko Yahi Padi Hai Ki Duniya Wale Jaane Bas Ki Me Kitna Deendaar Hu Mere Status, Posts, DP’s Wagaira Achche Achche Ho. Halan Ke Insaan Khud Janne Ki Koshish Hi Nahi Karta Ki Wo Kitne Paani Me Hai. Bandi Cell Phones Ke Khilaaf Nahi Hai, Social Sites Ke Khilaaf Nahi Hai Lekin Uska Sahih Se Use Kare To Koi Baat Bane. Bas Kehne Ka Maqsad Ye Hai Ki Bagair Ilm Ke Ye Nahi Dikhana Hai Ki I Have Something / Almost Everything.  Ek Kahawat Hai Na 'Empty Vessels Make The Most Noise.' Yaad Rakhe Hame Is Slogan Ka Example Nahi Banna Hai.

·         Ab Riyakaari Se Kaise Bache Aur Apne A'mal Ko Kaise Paak Kiya Jaaye ? Taaki Hamari Tasdeeq Se Waqeyi Hamari Haqqaniyat Jhalke.

 

ü  To Iska Ek Ilaaj Ye Hai Ki Allah Swt. Ko Har Waqt Haazir-o-Nazir Janna. Dekhiye Allah ^SWT Ke 99 Names (Asma Ul Husna) Me Se Ek Naam Ash-Shaheed Bhi Hai. Jiska Matlab Hota Hai Wo Zaat Jo Haazir-o-Nazir Hai (Shahid - The Witness). Jab Hamein Ye Naam Yaad Reh Jaaye Aur Baar Baar Yaad Aata Rahe To Ye Insaan Me Do Tarah Ke Ehsaas Paida Karta Hai

o   Ek To Khusi Dilaata Hai Us Waqt Jab Banda-e-Momin Achcha Kaam Kar Raha Hota Hai Ki Haan Mujhe Mera Allah Dekh Raha Hai Aur Sukoon Milta Hai.

o   Dusra Ehsaas Ki Khouf Taari Karta Hai Jaise Ki Ham Koi Gunaah Kar Rahe Hai To Uswaqt Allah ^SWT Ki Ye Sifat Hamein Yaad Aa Jaye To Shayad Ham Bach Jaye Gunah Se. Ki Nahi Koi Bhale Hi Nahi Dekh Raha Lekin Mera Allah Yahan Moujood Hai Aur Mujhe Dekh Raha Hai, Youm-e- Hashr Ye Gunaah Mere Liye Ruswaayi Ka Sabab Ban Sakta Hai. Ye Sonch Kar Ham Gunaah Se Baaz Aa Sakte Hai.

Lekin Is Case Ke Liye Ek Shart Hai Ki Insaan Khud Se Sach Bole. Gunaah Hai To Use Gunaah Hi Samjhe. Phir Aisa Nahi Ki Chalo Koi Ni Isme Kya? Ye To Mamooli Baat Hai, Sab Kar Lete Hai. Nahi, Hargiz Nahi, Yahan Par Bandi Ko Hazrat Peer-o-Murshid Faqeer Sayyad Khundmeer Mehdvi Sahab Ki Ek Taqreer Me Mohtaram Hazrat Ne Jo Baat Batayi Thi Wo Yaad Aa Rahi Hai Jo Kabil-e-Ghor Hai. Unka Sentence Ye Tha Ki Gunaah Bhi Gunaah Nazar Nahi Aata, Isse Badi Jhahiliyat Aur Isse Badi Bad Naseebi Aur Kya Ho Sakti Hai? Allaah Hu Akbar.!

Yaa Allah! Tu Hi Hai Jo Apne Bando Ke Dilon Ko Pher Sakta Hai. Aur Unse A’mal-e-Saleh Le Sakta Hai. Rasool-e-Akram ^SAW. Baar Baar Ye Dua Kiya Karte Ya Muqallibal Quloob! Sabbit Qalbi Ala Deenika Aur Iske Addition Me Ye Dua Bhi Padhte Ya Musarriful Quloob! Sarrif Qalbi Ala Ta'atika.  (Yaani Aye Dilon Ko Pherne Wale, Mere Dil Ko Apne Deen Par Sabit Qadam Rakh Aur Use Apni Ita'at Karne Wala Bana De. Aameen)

Allah Se Dua Hai Wo Hamein Saaleh A'mal Karne Ki Taufiq A’ta Kare Aur Hamari Niyyaton Ko Paak Kare Aur Haqeeqat Me Musaddiq-e-Mahedi ^AS. Banaye.

Subhanaka Allahumma Wa Bihamdika Wa Ashhadu Anlã Ilaha Illa Anta Wa Astagfiruka Wa A'tubu Ilayh.

Jazaak Allah Hu Khair!

References:-

• 1) Al Quran (09:07) , (09:36)
• 2) Al Aqaid, Hissa Awwat Safha No. 7
• 3) Naqliyat E Hz. Bandagimiyan Abdurrshid, 09
• 4) Sirat E Imamuna Mahedi As. , Safa No. 10 Ta 12
• 5) A)Hashiya Insafnama, N.213
•     B) Naqliyat, Miyan Abdurrshid, N. 193
•     C) Naqliyat, Miyan Abdurrashid, N. 238
• 6)  Insafnama(Matan Shareef)N. 129
• 7)Sahih Bukhari H.01

About the Essay and the writer: Mohtarma Tamakuwala Marufa Abdulhamid Saheba d/o Jabab Abdulhamid Hasan Bhai Tamakuwala Saheb and a Mureed of Hazrat Peer-o-Murshid Sayyad Aaftab Aalam Miyan Saheb is a resident of Daboi of Baroda District, Gujarat, India. She is a Student Third Year Bachelor of Science (B.Sc-Chemistry) in The Maharaja Sayajirao University Of Baroda. 

She wants to seek deeni knowledge and also share it with my all mahedvi brothers and sisters and she is wants to be a beneficial soul for our community. She desires to go ahead and excel in the field of Science, specially in Chemistry. We Wish her all the Best for all her future endeavors, May Allah Bless her with success in both the worlds. Aameen. We pray for her success in her studies as well, may Allah give her excellence in the field of Chemistry which she has chosen and make her a major contributor to the mankind with her higher studies.

This Essay is a part of the Second International Essay Writing Competition conducted by Mehdavia Times Welfare Trust during the Ramazan of 1442 hijri / 2021 taking the opportunity of the Pandemic Lock-down.  Ms. Marufa secured the Second Prize in the Senior Roman Urdu Category of this Competition. 

The results of the competition can be seen here ->>> https://mehdaviatimes.blogspot.com/2021/05/announcement-of-results-of-second.html

Note: We will be publishing daily one selected essay in this Ramazan for you to read. We take this opportunity to thank and congratulate all the participants, winners and evaluators and those who were directly or indirectly involved to make this initiative a grand success. Fresh Write-ups/Articles/Essays are always solicited you may send them to MehdaviaTimes@gmail.com . Disclaimer: The opinions expressed in this publication are those of the authors. They do not purport to reflect the opinions or views of the Mehdavia Times Welfare Trust or its members. Reproduction of the material contained in this publication may be made only with the written permission of Mehdavia Times Welfare Trust. To Err is Human, Please ignore any typos or concepts which you may find in his / her write-up. If you come across, any major typos kindly write to us on mehdaviatimes@gmail.com